Fagogo


Eseesega o Falea’oga
Tusia e Pulou Ama

“Good morning standard four.”

E manatua le leitio fa’asalalau a le ofisa o aoga i Malifa taeao taitasi ae faalogologo uma iai aoga i Samoa i le latou polokalame. Ao tau fa’a ofiofi vasega e fa i totonu o se potu aoga se tasi ma le leitio e alu i le maa aua sa leai ni eletise i na aso. O mataupu e a’oa’oina i aoga sa pule atu lava le nofoaga tu totonu i Malifa.

Oute manatua a maea se mataupu ona to va lea i se pese faili ae leai ni upu. O le taimi lena sa ou punou toele ai lalo ma lafilafi ina nei tofi ita e le faiaoga e fai taga o le pese. E tiga lava lota ma ae fosi lava e fai le “Chicken Dance.” O le tele o taga e amata mai le ulu , taua’u ma vae ae fa’ataitai uma iai le vasega.

A mae’a le leitio toe foi i vasega masani o le aso. O le taimi o le malologa sa faatali uma iai le aoga atoa. E manatua le toga niu sa i tua o le faleaoga sa mili i ai tamaiti e sue popo ma kuava e fai ai sina mea’ai o le aso. Ai ona o le mamao o le mea ua oo iai le matou suega popo i se tasi aso, na le mafai ai ona matou lagona le ta o le logo ua’mea o le aoga e faailoa ai i tamaiti aoga ua uma le malologa. Ua matou foi mai ua amata vasega, nofonofo loa i lalo o le laau seia tuua le aoga savavali faatasi ma tamaiti sa i le aoga le aso atoa.

A tu’ua fo’i aoga ae ua muamua i le fale isi vaega matutua ae te lei oo atu, o lona uiga ua lua fetaui ma le muli o le ulo ua ai uma le isi vaega le kopai po’o le alaisa fa’apopo. Ete tagi atu i lou ai’u ae fai mai si o’u uncle, “Sulu lou ie faigaluega ae alu i uta e ai sau o’o ma ai sau niu.”
Uma lena aso ua toe usu i le aoga ma mafaufau pe sa fai le mea a’oga sa faatonu atu e fai, aua o le fagaa’u, o le 2×4 ma le mautofu e te lua fetoai pe afai na galo.

O le natura lava lenei o le tamaititi aoga o le pupu solo i tafaoga e pei o pelega mapu, musa, oso, igavea e alai ona galo nei mea. E iai nisi taimi e faatonu mai e oti lou ulu ae alu atu lava i le aoga ua galo. Tago ifo loa le faiaoga i le seleulu oti loa ma le ulu fa’aaiaina ma fai mai, “Aua nei toe galo lou ulu i le faleaoga.”

… E faia pea …

Vaega Lua (Part Two)

O le olaga aoaoina o le tama ma le teine Samoa, o se olaga e faigata aua sa leai ni tupe e fa’a aoga ai.O le tele o matua sa usu lava i uta e faaputu le popo, tau le koko, fai le togafa’i, tau loa, fai le maumaga pe fagota se tau i’a aua pili o le fanau i le aoga. Atonu o le ala lea na toatele ai nai alo ma fanau na le uma ma fa’aiuina latou a’oaoga ona o le leai oni pili aoga.
E manatua lava la aso e faagata ai pili, e toe tutuli uma lava tamaiti aoga i le fale e lei totogia pili aoga. A leo lena e faapea mai matua, “Fai i lou faiaoga sei fua popo le aso Toonai ona e alu atu lea ma oe i le aso Gafua.” Ae uma foi ona fua popo ae fetaui ma mea fa’a le lotu ma mea fa’a le nuu ona galo ai lava lea ole pili aoga a le fanau.

Ua tupu le tama ma ua matua ua malaga i Upolu e faauma ai le aoga. O aoga i Upolu e iai kolisi maualuluga e sue uma mai iai aoga i Savaii ma nuu i tua. E iai foi aoga tualaga lua i Apia sa sue uma ai lava i suega ulufale lava lea e tasi. O aiga i Savaii ma nuu i tua sa faigata ona aumai tamaiti e aooga i Apia ona e leai ni aiga e nonofo ai. O le mea lena sa iu ai lava ina toe fa’aauau aoaoga a isi i aoga a itumalo. Ae afai ae iai se tasi o le tou nuu po’o se tausoga e nofo latalata i Apia, e faanoi iai le tele o matua pe mafai ona nofo aoga atu ai si o la alo. O le ala lena e taitoa tolu, fa tamaiti nofo aoga i aiga i Apia. Ua avea ai lava i latou o se aiga e tasi tusa lava pe eseese nuu ma afioaga e malaga mai ai..

Sa matua tele lava le eseesega o aoga i Savaii ma le mea lea ua oo iai i Upolu. Ua suia foi le vaaiga i le tele o taavale ma faleoloa sa le masani ai. Ua amata foi ona ai le falaoa ma le pata ae ua galo le popo ma le esi. Ua fai lelei foi lavalava pei o ofuvae ma seevae tosotoso ae ua galo atu le i’ei’e faigaluega ma le pea taga a le solofanua. O nisi ua amata ona fa’ataitai i taaga a tupulaga o nuu o loo nofo aooga ai. Ae o le sini ma le faamoemoe o le fa’aauauina lea o aoga pei ona tuua ai aiga i Savaii.

E manatua taeao taitasi pe afai a ‘e tuai atu i le aoga ae ua amata le sisiina o le fua. Po’o fea lava o le malae o le aoga po’o lalo o se laau ua e o’o atu iai e te tu fa’asasao e leai ma se tasi e toe migoi. Sei uma foi la ona sisi le fua faatoa e toe savali lea. A’o le taimi foi lena i le alu a le peni a ta’ita’i e tusitusi i lalo igoa o le au vele vaofefe pe a tuua le aoga. E iai tama ma teine ua taua o taitai o le aoga, ma oi latou na sa fai ma ota fili aua e te sese loa iai tusi i lalo lou igoa i le au faasala. O nisi o aoga e faasala oe pe a maua atu o e tautala faa Samoa. O le taumafaiga lava ina ia lelei lau “is is” aua sou lumanai manuia. O le tele o taimi oute vaai atu loa i tamaiti afakasi pe popoto foi oute aloalo mamao nei tei ua nanu mai se isi ia te au ae leiloa le tali e fai iai.

Manatua nao le 20-sene sa i le taga e pasese ai ae leai se tupe e ai ai. O lona uiga a fia ai ua fa’atau le pagikeke i le 10-sene ae savali i le fale pe a tuua le aoga.

Ua sui le taimi ma ua amata ona fai manatu i teine ae sa le masani ai. Masalo o le matamata ata tifaga ile Tivoli ma le Savalalo Grand na amata ai ona fia tama matua. Ua fai tonu ma le teine e talanoa i tua o le maketi pe a tuua le aoga. O nei faiga e fai fa’anana aua e fefefe i aiga nei maua se isi.

…E faia pea…

Advertisements

7 Responses to Fagogo

  1. Anonymous says:

    To be continued………………….

  2. Seki Seki lava le taumafaiga “FAGOGO” Pulou! Ua toe faamanatu mai ai nei mea uma sa iai le olaga i ia taimi i Samoa. Ole vaitaimi ole “Mativa” Keep it up. I love reading them.

  3. Anonymous says:

    Malo le fai fagogo..sa’o ai Tofiga – you bring back some painful memories..lol..jks..but very humble beginning…

  4. Anonymous says:

    vaai lau loli i lavea i le tusiiga o lau fagogo sole…lol. O le kua kele lava o au kalegi uso. MALO, magaia le fagogo. faatalitali atu i le part 2.

  5. Anonymous says:

    fale o ai lea e fai mai ai ou mafaufauga……vaai I maua e le palagi

  6. Anonymous says:

    a maua foi vaai se isi o avagoa loga faleoo e mapu aku iai

  7. Kiose Fiso says:

    e malie lava le falogo atu i ” Fagogo” a le atunu’u e manatua ai pea mea na masani ona fai i lea taeao ma lea taeao…………

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s